Er Ajuntament de Vielha e Mijaran realize trabalhs de desinfeccion dera Escòla Garona

Entà poder iniciar eth cors escolar enes melhores condicions de seguretat

Pendent aguesta setmana, er Ajuntament de Vielha e Mijaran a iniciat es trabalhs de desinfeccion dera Escòla Garona de Vielha de cara a deishar-la enes melhores condicions de seguretat entath nau cors escolar que començarà eth pròplèu 14 de seteme. Damb aguesta intervencion, eth consistòri da contunhitat as prètzhèts entà qu’es alumnes, pairs/mairs e er equip de professorat poguen tornar ara escòla damb eth menor risc de contagi deth covid-19.

En agost, era brigada municipau, damb eth supòrt deth personau contractat pes plans aucupacionaus, pintèc totes es aules dera escòla, atau coma es correders. Atau madeish, tanben s’a proporcionat e installat dispensadors de gel idroalcoòlic e productes desinfectants, coma mesura de prevencion de contagi laguens deth pròpri centre pendent eth cors escolar. Ath delà, er Ajuntament ampliarà un torn de neteja entre es 10 e es 12 ores en pati entà melhorar era desinfeccion d’aguest espaci qu’ei a on mès coincidís era mainadèra a diari.

D’aute viatge, eth consistòri a mantengut amassades de coordinacion damb er equip directiu dera Escòla Garona entà aplicar naues mesures de seguretat ena entrada e gessuda der alumnat. En aguest sens, se procedirà ath barrament deth transit de veïculs ena Avenguda deth Solan (deuant deth centre escolar), entà qu’es pairs/mairs poguen deishar o arremassar as sòns/sues hilhs/es, ena madeisha via, en lòc dera entrada, entà poder mantier ua distància de seguretat fòrça mès ampla, en tot previer eth risc de contagi.