Bona acuelhuda enes prumèri dies dera iniciativa 'Mercats d’Aran'

Fomente eth comèrç locau e artesanau pendent es tardes d’agost en diferents pòbles

Aguesta setmana s’a metut en foncionament dejà eth nau projècte entath foment deth comèrç artesanau dera Val d’Aran, 'Mercats d’Aran', ua iniciativa prebotjada peth Conselh Generau a trauès de Foment Torisme Val d’Aran e qu’a compdat tanben damb eth finançament dera Deputacion de Lleida, atau coma establís er airau de promocion economica deth sòn convèni marc damb eth govèrn d’Aran.

“Aguesta ei ua iniciativa que fomente eth comèrç locau e artesanau en territòri, damb productes de proximitat de tot tipe” afirmaue eth conselhèr d’Economia, Torisme e Promocion economica, Juan Antonio Serrano, “ath delà, en èster un mercat itinerant aufrís era possibilitat de dinamizar es pòbles enes que se realize pendent era setmana”. 'Mercats d’Aran' se celèbre totes es tardes deth mes d’agost de deluns a diuendres enes pòbles de Salardú, Vielha, Bossòst, Arties e Les, respectivament.

“Ath delà des parades des diferents comèrci, compdam tanben damb actuacions de diferents artistes deth territòri entà amenizar aguestes serades e aufrir ua melhor experiéncia ara gent que s’i apròpe, ath viatge que hèm ua apòsta peth talent locau”, indicaue eth conselhèr. Enes prumèri dus dies, aguesta iniciativa a compdat damb ua fòrça bona acuelhuda per part deth public. Rebrembam qu’entà gaudir de forma segura d’aguest eveniment, totes es persones que s’apròpen a aguesti mercats itinerants auran de seguir es mesures establides pes autoritats sanitàries.

El + vist

El + comentat