Se reprén era activitat deth Centre de Dia dera Residéncia Sant Antòni

Pendent aguestes setmanes s’an reiniciat tanben es ingrèssi ena residéncia

Aguest diuendres es usatgèrs e usatgères deth centre de dia dera residéncia Sant Antòni poderen tornar ara sua activitat, qu’auie estat arturada des der inici dera pandemia en mes de març. Es responsables dera residéncia an amiat a tèrme un plan foncionau entà desseparar es dues installacions, centre de dia e residéncia, entà assegurar qu’es beneficiaris e professionaus d’andús recorsi non agen contacte entre eri ne compartisquen espacis, atau e coma mèrque era normativa vigenta.

En aguest sens, cau destacar tanben que pendent aguestes setmanes s’an reprenut es ingrèssi que demorèren arturadi pera crisi sanitària. Aguesti naui ingrèssi, as que se les a realizat era pròva PCR d’acòrd damb es indicacions des autoritats epidemiologiques, demoraran en isolament ena madeisha residéncia pendent 14 dies enquia poder descartar cap contagi.

Era conselhèra d’Igualtat, Salut e Benèster deth Conselh Generau d’Aran, Maria Vergés, declaraue qu’era reactivacion deth Centre de Dia “ei ua bona noticia, sustot entàs familhes e usatgèrs, qu’an estat mesi sense poder accedir ath servici pes restriccions que mos a imposat era pandemia”. Pendent es darrères setmanes tanben s’an reprenut es visites de familhars ena residéncia, que demorèren anullades en mes de junhsèga. Aguestes se realizen dus viatges per setmana damb totes es mesures de seguretat mercades.

El + vist

El + comentat