Eth Conselh Generau inicie era campanha “Aguest Nadau, consumís en Aran”

A coma objectiu promòir e incentivar eth consum locau e de proximitat

Eth govèrn deth Conselh Generau d’Aran, a trauès de Foment Torisme Val d’Aran, a lançat era campanha “Aguest Nadau, consumís en Aran”, entà incentivar eth consum locau e de proximitat en aguestes dates tan senhalades. “Ara mès que jamès ei de besonh fomentar eth comèrç locau e artesanau, sustot de cara as hèstes de Nadau, quan ei mès abituau un increment d’activitat en aguest sector”, assegure eth conselhèr d’Economia,  Torisme e Promocion Economica, Juan Antonio Serrano, en tot híger que: “actuaument ei fòrça abituau eth consum online de tot tipe de productes, mès mos trapam en ua situacion ena que mos cau dar supòrt as nòstes botigues, pr’amor qu’era Val d’Aran aufrís era possibilitat d’aquerir ua amplia varietat de productes de grana qualitat e de tot tipe: textils, artesanaus, agroalimentaris, esportius o infantils, entre d’auti”.

En aguest sens, eth conselhèr d’Economia, Torisme e Promocion Economica, Josep Canut, a afirmat que: “dejà en inici dera pandemia lançèrem era campanha 'Pensa en Aran, consumís en nòste comèrç', entà conscienciar ara poblacion deth besonh de dar supòrt as nòste teishit empresariau” e hig que: “ath delà dera activacion economica que compòrte aguest tipe de comèrç, ei òbvi que cada còp existís ua major conscienciacion dera poblacion damb eth miei ambient, e eth consum de productes de proximitat ei fòrça mès sostenible”. Era campanha “Aguest Nadau, consumís en Aran” s’alongarà pendent totes es hèstes.