Eth Conselh Generau auance ena candidatura dera Val d’Aran coma Resèrva dera Biosfèra dera UNESCO

Enes pròplèus dies aurà lòc era jornada de presentacion deth projècte

Eth govèrn deth Conselh Generau d’Aran, a trauès d’Inèdit e Verd e Blu, se trape en fasa de redaccion dera candidatura dera Val d’Aran coma Resèrva dera Biosfèra  reconeishuda pera UNESCO, un projècte impulsat entà promocionar damb un reconeishement internacionau er auviatge culturau e naturau dera Val d’Aran.

“Pendent aguest ostiu s’an realizat ua sèrie d’enquestes as persones qu’an visitat era Val d’Aran e d’aguestes enquestes se’n pòt trèir ua conclusion fòrça clara: es principaus atractius toristics que les an botjat a visitar Aran son era natura, eth paisatge e era cultura”, assegure eth sindic d’Aran, Francés Boya, que hig que: “en aguest sens, era candidatura ara Resèrva dera Biosfèra, ath delà d’aufrir un modèl d’auto-governança deth territòri, mos pòt perméter reconéisher es nòsti valors patrimoniaus, sustot a nivèu culturau e naturau, e mos servirà tanben entà diferenciar-mos d’auti territòris”.

Aspèctes coma eth desvolopament economic sostenible, era recèrca aplicada ath territòri, era promocion des productes e gastronomia locau, atau coma eth torisme son aspèctes primordiaus a considerar entath bon dessenh e foncionament dera futura Resèrva. Ei de besonh destacar qu’aguest reconeishement non ei ua figura de proteccion deth territòri, mès òc que profite es zònes de conservacion dejà existentes e declarades.

“En aguesta prumèra fasa de redaccion dera candidatura dera Val d’Aran coma Resèrva dera Biosfèra, eth govèrn deth Conselh Generau cerque era maxima implicacion de tot eth territòri. Dejà s’a artenhut compdar damb eth supòrt de lèu toti es Ajuntaments aranesi, e tanben s’a implicat a entitats tan importantes coma eth Grèmi d’Ostalaria e era estacion Baqueira Beret”, explique Boya.

Enes pròplèus dies aurà lòc era jornada de presentacion deth projècte e, lèu, auràn lòc tanben diuèrses jornades de participacion entà definir es òrgans de governança e eth plan d’accion dera Reserva dera Biosfèra Val d’Aran.