Eth Conselh Generau d’Aran presente era sèrie en aranés 'Èm çò qu’èm'

Cerque prebotjar era normalizacion lingüistica der aranés a trauès dera ficcion e er umor

Aguest dijaus a auut lòc era presentacion oficiau dera naua sèrie en aranés 'Èm çò qu’èm', impulsada peth govèrn deth Conselh Generau d’Aran dera man de Lleida TV a trauès dera productora audiovisuau Kionalia Project. En aguest acte de presentacion, en qu’an estat present es persones implicades en desvolopament d’aguest nauedós producte audiovisuau, eth sindic d’Aran, Francés Boya, a remercat era importància qu’a entara normalizacion dera lengua pròpria d’Aran era creacion d’aguesta sèrie.

“Des deth govèrn d’Aran auem apostat per ua forma mès creativa entà impulsar era promocion e normalizacion dera nòsta lengua pròpria pr’amor que, a despièch des dificultats damb es que mos trapam entà poder desplegar ua politica lingüistica eficaç entà lutar contra era desaparicion der aranés, consideram indispensable contunhar trabalhant e cercant naues formules entà apropar era lengua as naues generacions”, a afirmat eth sindic d’Aran.

Aguest nauedós producte audiovisuau apòste pera ficcion e er umor entà prebotjar era normalizacion lingüistica der aranés e, a trauès de diuèrsi gags, tractarà es errors e dubtes mès comuns qu’apareishen en emplec abituau dera lengua pròpria d’Aran, damb era finalitat d’apropar era lengua a un public extens en un format pòc explotat enquiara. Aguesta produccion ei protagonizada peth Servici d’Intelligéncia Aranesa SIA, ua expèrta ena lengua pròpria d’Aran, acompanhada de d’auti personatges interpretadi per actors e actritzes deth territòri.

“Damb aguesta produccion non sonque trabalham ena normalizacion dera lengua, senon que tanben dam visibilitat ath gran talent que i a ena Val d’Aran”, a assegurat eth sindic d’Aran ath temps qu'arregraïe a totes es persones que i an participat “era sua dedicacion e volontat de collaborar en impuls der aranés”.

Èm çò qu’èm s’estrearà eth dijaus, 24 de seteme, e s’emeterà en Lleida TV es dijaus tàs 22:55 dera net e en totes es televisions locaus de Catalunya a trauès de La Xarxa es diuendres tàs 08:55 deth maitin. Tanben se poderà trapar ara carta enes sues webs.

El + vist

El + comentat