Pirineus 10/11/2020

Eth Conselh Generau inície un plan de dinamizacion deth comèrç dera Val d’Aran

Se fonamentarà en tres èishi: eth comèrç transfronterèr, eth locau e eth toristic

Ara Pirineus
1 min
Un comèrç de Vielha. / CGA

Vielha e MijaranEth govèrn deth Conselh Generau d’Aran, a trauès de Foment Torisme Val d’Aran, iniciarà un plan de dinamizacion economic-comerciau entà estimular eth comèrç en territòri. “Ei important entath govèrn d’Aran cercar naues formules entà crear naues possibilitats de futur en nòste territòri, en tot estudiar d’auti modèus d’èxit en zònes toristiques a on eth comèrç supause un pilar important dera sua economia”, afirmaue eth vicesindic e conselhèr d’Economia, Torisme e Promocion economica, Juan Antonio Serrano.

Era prumèra fasa d’aguest plan de dinamizacion se centrarà en un analisi dera situacion actuau deth comèrç en Aran acompanhat d’ua sèrie d’enquestes ara poblacion locau e visitants. Aguest plan se fonamentarà en tres èishi: eth comèrç transfronterèr, eth locau e eth toristic.

“En aguesti moments, eth comèrç locau se trape en ua situacion fòrça complicada pr’amor dera crisi sanitària, sociau e economica provocada peth covid-19 mès tanben pr’amor deth creishement des crompes online”, asseguraue eth conselhèr Serrano, en tot híger que: “volem dinamizar aguest sector en tot trabalhar amassa damb es persones que se i dediquen ena Val d’Aran, entà cercar naues oportunitats e diversificar era nòsta economia de cara ath futur”.

stats