Eth Conselh Generau inície es trabalhs de bastiment deth prumèr tram deth camin ciclable TransGarona
Connectarà era Val d’Aran damb Tolosa e facilitarà era mobilitat sostenible
Vielha e MijaranEth Conselh Generau d’Aran a iniciat dejà es trabalhs de bastiment deth prumèr tram deth trajècte aranés deth camin ciclable TransGarona, un tram que va dera frontera francesa enquia Pònt de Rei e qu’a 2,5 km de nau bastiment e profite tanben bèth tram d’un antic camin. Eth projècte Transgarona, impulsat peth Conselh Generau d’Aran e eth Conseil Départemental de la Haute-Garonne a trauès d’un programa Interreg POCTEFA, ei un projècte transfronterèr que traçarà un camin ciclable que connectarà era Val d’Aran damb eth centre-sud de França. Eth totau deth recorrut serà d’aprupètz 200 km, entre Tolosa e era Val d’Aran.
Segontes afirme era sindica d’Aran, Maria Vergés, “damb era creacion d’aguesta rota ciclable non sonque s’amplie era aufèrta esportiva en nòste territòri senon que, ath delà, se cree un nau producte toristic e de mobilitat a nivèu internacionau” e hig que “eth projècte Transgarona contribuirà a facilitar ues politiques territoriaus de mobilitat sostenibla, espòrt saludable e activacion territoriau per miei dera valorizacion deth pròpri territòri”.
Era inversion en aguest projècte per part deth Conselh Generau d’Aran ascendirà ath torn de 1,6 milions d’euròs, e eth Conseil Départemental de la Haute-Garonne invertirà 2,43 milions. Aguesta inversion vierà finançada ath 65% per part d’un hons FEDER.
