Era Glèisa de Mijaran acuelherà era exposicion itineranta “Reiaume der Aneto, un espaci en Pirenèu”

Met en valor es semblances istoriques e actuaus de Vielha damb es localitats de Benasque e Luishon

Er Ajuntament de Vielha e Mijaran e era Fondacion Musèu Etnologic dera Val d’Aran organizen deth 16 ath 24 de seteme era exposicion itineranta “ Reiaume der Aneto, un espaci en Pirenèu”, que serà plaçada ena Glèisa de Mijaran. Aguesta iniciativa preten méter en valor es semblances istoriques e actuaus de Vielha e Mijaran damb es localitats pirinenques vesies de Benasque e Luishon. Era exposicion compdarà damb elements comuns coma: era situacion geografica, era istòria comuna a compdar dera Edat Mejana, es conflictes belics e era economia basada en sector primari e terciari. Er objectiu ei méter en valor totes aguestes semblances en tot seguir criteris de sostenibilitat.

Deth 2 ath 12 de seteme, era exposicion se pòt visitar en Complex Du Casino de Luishon, e dempús d’auer estat en Vielha, se poderà gaudir en Benasque der 1 ath 12 d’octobre en Palacio de los Condes de la Ribagorza. Ath delà, eth 19 de seteme, era madeisha glèisa acuelherà era jornada de conferéncies “Reiaume der Aneto, un espaci en Pirenèu” damb eth següent programa: Entàs 16:00 “Eth Pireneisme deth s.XIX e era sua transicion ath s.XX” (a cargue de Claudio Aventín), entàs 17:00 “Era evolucion ath producte toristic: Experiéncies de nauta montanha” (a cargue de José Luis García), entàs 18:15 “Torisme intelligent: Deth mapa ara version digitau” (a cargue de Dani Gavaldà) e entàs 19:00 “Comercializar en tempsi difícils“ (a cargue de Manuel Mosteiro e Giselle Küsters).

Aguesta accion ei includida laguens deth projècte “Reiaume der Aneto” que compde damb finançament deth Programa INTERREG V-A España-Francia-Andorra (POCTEFA 2014-2020) a on i participen er Ajuntament de Vielha e Mijaran, era Commune de Bagnères-de-Luchon e era Fundación Hospital de Benasque, desvolopat entre es ans 2016 e 2020.