Vielha e Mijaran amplie pendent tot er ostiu es trabalhs de desinfeccion diària

Era brigada netege es carrèrs de tot eth municipi, sustot der airau sanitari e parcs infantils

Er Ajuntament de Vielha e Mijaran contunhe en tot aplicar un vast plan de neteja de tot eth municipi, entà previer eth risc de contagi deth covid-19. Aguesta intervencion que comencèc pendent er estat d'alarma seguís aué dia, en tot refortilhar es prètzhèts de desinfeccion de toti e cadun des pòbles deth municipi. Ua mesura que se realize des de prumèra ora deth maitin, e que suberven, sustot, en airau sanitari, a on i a fòrça mès risc entàs pacients der Espitau Val d'Aran e es usatgèrs dera Residéncia Geriatrica Sant Antòni de Vielha. En aguest sens, a trauès d'ua maquina aigualejadora, s'a implementat er esfòrç entà desinfectar e netejar aguesti espacis, atau coma es parcs infantils, qu’era mainadèra ja pot gaudir. Enes parcs, precisament, era desinfeccion tanben s'amie a tèrme diariament entà qu'es mès petiti e es pairs e mairs poguen auer era seguretat de que son espacis liures de risc de contagi, e que pòden jogar damb tota tranquillitat.

Aguesta neteja a estat ua constant enes darrèri quate mesi, en tot mantier es espacis publics en melhor estat possible entà garantir era salut dera ciutadania e des visitants que i aurà aguest ostiu en Vielha e Mijaran. “Des der Ajuntament trabalham sense descans entà garantir es melhores condicions possibles de desinfeccion en tot previer eth contagi deth covid-19. Era brigada municipau pòrte lèu quate mesi damb un gran esfòrç entà qu'es espacis publics siguen segurs”, comente eth baile de Vielha e Mijaran, Juan Antonio Serrano.

El + vist

El + comentat