Eth comitat de trabalh de terrasses de Vielha e Mijaran s'amasse entà balhar tramit as naues peticions de licéncies

Vielha e MijaranAguest dimars auec lòc en Ajuntament de Vielha e Mijaran ua naua amassada periodica deth comitat de trabalh que decidís sus era modificacion e es sollicituds de terrasses en municipi. Aguest comitat se constituïc eth darrèr mes de junh de 2020, en un acòrd entre er Ajuntament de Vielha e Mijaran e eth Grèmi d'Ostalaria dera Val d'Aran, e ei format per 7 membres: 2 tecnicians deth consistòri, 2 representants deth Grèmi d'Ostalaria dera Val d'Aran, 1 membre deth Conselh dera Vila e 1 còsso der ajuntament (representat peth 3au tinent de baile e còsso de governacion, Ramon González).

Ena amassada se balhèc compde des sollicituds de naues terrasses, atau coma des ampliaments per part des establiments. En prumèr airau, eth comitat a comunicat qu'en 2020 s'autorizèc 100% des peticions des naues terrasses, e en 2021 des 7 sollicituds, s'a autorizat a 6. En çò que tanh as ampliaments, en darrèr cors s'autorizèc eth 60% des peticions.

Un des punts qu'a subervengut eth comitat ei era importància de complir damb eth periòde entà formalizar era demanda de licéncia entàs terrasses, donques qu'entà sollicitar aguesta licéncia sus un an naturau, s'a de demanar abans deth 31 d'octobre der an anteror ara sua obtencion. En aguest sens, des 52 terrasses que se dispòsen, sonque 7 establiments auien demanat era licéncia entà 2021.

Aguest organ siguec creat, entà amassar-se periodicament, damb era finalitat de regular era concession des terrasses as establiments dera ostalaria e dera restauracion, en un moment complicat a arraïtz dera aparicion dera pandémia deth covid-19, entà promòir mesures que favorisquen era progressiua reactivacion economica deth sector, en tot garantir eth compliment des nòrmes de seguretat e igiene en vigor.