Lum verda as naues normes e planejament des abitatges d'us toristic en Vielha e Mijaran

Vielha e MijaranEra Comission d'Urbanisme dera Val d’Aran amassada aguest dimars a aprovat es naues normes e planejament des abitatges d'us toristic en municipi de Vielha e Mijaran. Aguesta mesura servirà coma basa/guida entara modificacion legislatiua en tota Catalonha damb er objectiu de favorir eth dret ar abitatge que garantisque un parc immobiliari estable de viuendes en regim de loguèr, ath viatge que se procure ua insercion avienta der emplec d’abitatge d’us toristic en teishit urban.

Er Ajuntament de Vielha e Mijaran pòrte diuèrsi ans en tot trabalhar en aguest ahèr, que preten assegurar ua bona convivéncia en un sector coma ei er immobiliari, entà que sigue beneficiós entara ciutadania e entath conjunt deth municipi.

“Èm fòrça satisfèti damb aguesta mesura que s’a aprovat ena Comission d’Urbanisme, pr’amor qu’es abitatges d’us toristic ei un ahèr que preocupe fòrça en nòste territòri”, comente eth baile de Vielha e Mijaran, Juan Antonio Serrano. E hig que “eth consistòri pòrte ans implicat en aguest ahèr, damb eth que cercam assegurar ua bona convivéncia, e lutar per arturar era pujada des prètzi des loguèrs e esvitar problèmes enes comunitats de vesins ocasionadi per usatgèrs esporàdics, en tot garantir eth descans des vesins e vesies”.

Pendent era comission d’urbanisme s’a aprovat tanben era prepausa d’òbres de condicionament d’ua nau dejà existenta en municipi de Les e era adequacion d’un espaci de gestion de bòsqui publics, damb era conseqüent produccion de biomassa. “Des deth govèrn deth Conselh trabalham entà qu’era Val d’Aran sigue capaç de hèr ua bona gestion des sòns bòsqui, de forma que pogam profitar es milèrs de tones de husta qu’auem disponible cada an, en tot apostar per ua energia renovable e de proximitat ath còp que suenham es nòsti bòsqui e les mantenguem nets e en bones condicions”, declaraue eth sindic d'Aran, Francés Boya.

Era comission d’urbanisme dera Val d’Aran a aprovat eth Plan especiau urbanistic entara implantacion d’ua planta de tractament d’àrids en pòble d’Arties. Pera sua part, a quedat en suspension era aprobacion dera propòsta dera Modificacion des Nòrmes subsidiaries e complementaries entara delimitacion deth PAU-2 de Bagergue ara demora qu’er Ajuntament de Naut Aran incorpòre quauques prescripcions.