Pirineus 13/12/2020

Era sindica d’Aran sollicite ara Generalitat eth lheuament des restriccions de mobilitat des dimenjades

Vergés tornèc a insistir tanben en qué se reprene era mobilitat damb França

Ara Pirineus
3 min

Vielha e MijaranEra sindica d’Aran, Maria Vergés, envièc aguest diuèndres ua naua carta as conselhèrs de salut e interior dera Generalitat de Catalunya atau coma ath president en foncions entà que se lhèuen es restriccions de mobilitat es dimenjades dempús der anonci de dauriment des estacions d’esquí eth pròplèu dia 14 e deuant des bones donades epidemiologiques actuaus en Aran

Dempús der anonci que hec eth govèrn catalan d’aplicar mesures asimetriques en foncion dera situacion epidemiologica de cada territòri, era sindica d’Aran demanèc lheuar es restriccions de mobilitat vigent es dimenjades pendent es hèstes de Nadau, tostemp aplicant es mesures e protocòls de besonh entà controlar es donades de covid-19 en Aran

Pendent eth dia de diuendres se comuniquèc qu’es estacions d’esquí catalanes, d’acòrd damb eth govèrn dera Generalitat, dauriràn eth dia 14 de deseme de forma graduau e de conformitat damb eth plan de dubertura progressiva d’activitats. Entara sindica d’Aran: “aguesta ei ua fòrça bona noticia entath sector pr’amor qu’ajudarà a activar era economia de fòrça territòris de montanha totun entara Val d’Aran aguesta dubertura demore totaument condicionada e redusida pr’amor des restriccions de mobilitat, sustot des dimenjades”.

Ei pr’amor d’açò qu’era sindica d’Aran, Maria Vergés, s’a adreçat nauament ath president en foncions dera Generalitat de Catalunya, Pere Aragonès, ara conselhèra de Salut, Alba Vergés, e ath conselhèr d’Interior, Miquel Sàmper, entà sollicitar ath govèrn catalan “que se lhèuen es limitacions de mobilitat vigentes de diuendres a deluns, en çò que hè ath confinament municipau atau coma ath comarcau”.

Era sindica d’Aran manifestaue en aguestes cartes que: “èm totaument conscients dera situacion provocada pera covid-19 e deth besonh d’aplicar es mesures e restriccions entà controlar eth virus, mès en tot atier ar anonci hèt peth madeish govèrn dera Generalitat ena presentacion deth Plan de Dubertura, a on se manifestèc era possibilitat d’aplicar mesures asimetriques en foncion dera situacion epidemiologica e, auent en compde es bones donades qu’a actuaument era Val d’Aran, demanam poder lheuar aguestes restriccions” e higie que tath govèrn d’Aran “aguesta demana ei clau tà qu’eth nòste territòri pogue activar era sua economia e s’evite eth barrament de negòcis des que ne depenen fòrça familhes araneses”

En aguestes missives, Vergés tornèc a insistir tanben en qué se reprene era mobilitat damb França, dera madeisha forma que s’estúdie hèr damb era comarca der Alt Urgell e eth Principat d’Andòrra.

stats