Pirineus 06/03/2021

Vielha melhorarà eth hilat d'aigües, sanejament e pavimentacion de diuèrsi carrèrs pendent aguest ostiu

En un conjunt de carrèrs que hè mès de 50 ans que non an estat reformadi, damb ua inversion de mès de 350.000 èuros

ARA Pirineus
1 min
Obres ath hilat d'aigües de Vielha

Vielha e MijaranEr Ajuntament de Vielha e Mijaran a aprovat eth projècte des òbres de melhora deth hilat d'aigües, sanejament e pavimentacion d'un conjunt de carrèrs de Vielha, que seràn reformadi aguest pròplèu ostiu. En aguesta intervencion, avalorada en 357.554,10 èuros, s'amiarà a tèrme ua modernizacion complèta de toti aguesti servicis basics en carrèrs que demoren en un estat fòrça maumerenc. Ua actuacion plan de besonh, pr'amor que hè mès de 50 ans que non s'an hèt melhores en aguesti servicis e a on es carrèrs presenten un acabat de hormigon fòrça deteriorat o damb un godron qu'a patit fòrça reparacions ath long des ans e, en conseqüéncia, presenten irregularitats, henerècles e deteriorament pera retirada dera nhèu e pes cambis de temperatura en iuèrn.

"Damb aguesta actuacion melhoraram eth hilat d'aigües e sanejament, un servici basic e essenciau entara nòsta ciutadania, en carrèrs que portauen mès de 50 ans sense èster reformadi integraument e auien de besonh èster intervengudi damb era corresponenta melhora dera sua pavimentacion", comente eth baile de Vielha e Mijaran, Juan Antonio Serrano. E ahig que "un des compromisi d'aguest equip de govèrn ei precisament era melhora e renauiment deth hilat d'aigües ena que portam diuèrses intervencions en tot melhorar eth subministrament d'aigua en tot eth municipi”.

stats