Eth Conselh Generau d’Aran cree un nau producte toristic tà méter en valor es pòbles aranesi

Vielha e MijaranEth Conselh Generau d’Aran a creat un nau producte toristic, Cornèrs d’Aran, qu’enquiath pròplèu 6 de seteme aufrirà rotes guidades gratuites per cornèrs mès emblematics e especiaus des pòbles aranesi, en tot gaudir des istòries e secrèts qu’amaguen es sòns carrèrs. Aguesta iniciativa includís 9 rotes diàries e 4 nocturnes de dues ores de durada, de dificultat baisha e mieja, dirigides a un public familhar. Entà participar-i sonque ei de besonh inscriuer-se enes oficines de torisme de Vielha o Salardú, pr’amor que per motius de seguretat, es places son limitades.

Enes visites de dia se pòden conéisher en pregonditat endrets coma era Artiga de Lin, Bossòst, Es Bòrdes, Garòs e Arties, Les, Tredòs, Vilamòs e era Val de Toran. Per çò que hè ath ser, era “Noctubox” aufrís activitats nocturnes coma er “Aquelarre d’idèes”, er “Aquelarre de bièra REFU”, era activitat mitologia deth cèu o era activitat sus es arratescaudes.

Damb er objectiu de dinamizar e potenciar era activitat economica deth territòri, condicionada pera crisi provocada peth covid-19, eth govèrn deth Conselh Generau d’Aran a optat pera contractacion de joeni deth territòri entà guidar aguestes activitats. En aguest sens, eth sindic d’Aran, Francés Boya, declaraue que: “entath govèrn d’Aran trabalhar ena dinamizacion economica e eth supòrt as joeni deth nòste territòri ei ua prioritat enes moments que viuem”.

Eth departament de Torisme e Promocion Economica deth Conselh Generau d’Aran a trabalhat pendent setmanes, amassa damb es sectors dera ostalaria, era restauracion e eth comèrç deth territòri, entà qu’era tempsada d’ostiu se vedesse çò de mens afectada possible pera crisi deth covid-19, en tot aplicar es mesures de besonh e ampliar era aufèrta toristica dera Val d’Aran damb naues iniciatives coma “Cornèrs d’Aran” o coma “Mercats d’Aran”, prebotjada tanben peth Conselh Generau d’Aran a trauès de Torisme Val d’Aran entà fomentar eth comèrç locau artesanau e de proximitat e qu’auràn lòc pendent totes es tardes deth mes d’agost, de deluns a diuendres, enes pòbles de Salardú, Vielha, Bossòst, Arties e Les, en aguest orde.