Pirineus 15/12/2020

Eth nau bulletin deth Centre de Lauegi aufrís dejà es sues prediccions en aranés

Es servicis dera region deth Tiròl, Sud-Tiròl e Trentin aufrissen tanben ua prediccion en aranés

Ara Pirineus
2 min
Eth nau bulletin deth Centre de Lauegi aufrís dejà es sues prediccions en aranés

Vielha e MijaranDempús de quauqui mesi de trabalh, es professionaus deth Centre de Lauegi deth Conselh Generau d’Aran (damb era collaboracion des administradors tirolesi dera plataforma Albina) an artenhut adaptar era plataforma entà generar eth bulletin de perilh de lauegi ena Val d’Aran en cinc lengues: aranés, catalan, castelhan, francés e anglés.

Era implementacion der aranés en aguest airau tan restacat damb eth territòri, ajuda ara sua normalizacion e proteccion. Ath delà, cau destacar que es servicis dera region aupina deth Tiròl, Sud-Tiròl e Trentin, per miei deth projècte Interreg Albina, aufrissen tanben ua prediccion en aranés ena sua web Avalanche.Report.

Aguest bulletin diari a coma objectiu informar sus eth grad de perilh de lauegi entà qu’es persones que practiquen activitats ena montanha pendent er iuèrn (autant a nivèu professionau coma recreatiu) agen era informacion de besonh entà suenhar era sua seguretat. Es tecnics e tecniques deth Centre de Lauegi dera Val d’Aran trabalhen entà incorporar era web complèta Avalanche.Report adaptada ara Val d’Aran. Aguesta web includirà eth mapa interactiu de perilh de lauegi damb es 3 subregions, era visualizacion deth bulletin optimitzada e un fòrça mès informacions de supòrt entà interpretar eth bulletin, es condicions meteorologiques, es perfils de nhèu, o eth blòg, entre d’autes.

stats