Vielha e Mijaran apròve eth projècte entà bastir ua pista poliesportiua exteriora

Vielha e MijaranEr Ajuntament de Vielha e Mijaran bastirà ua pista poliesportiua exteriora aguesta pròplèu primauera de 2021, dempús dera aprobacion deth sòn projècte pera Junta de Govèrn Locau. Era installacion serà plaçada en passeig fluviau de Vielha, just ath cant dera actuau pista de padel deth Palai de Gèu.

Aguest equipament compdarà damb ua pista de futbòl sala e ua de basquet. En sòn bastiment tanben s'amiarà a tèrme eth plaçament d'un barrament perimetrau hèt damb ua rèisha electrosoldada plastificada d'1,80 mètres de nautada, entà melhorar era qualitat der acabat e empedir er accès a persones non autorizades. Atau madeish, era pista compdarà damb ua rèisha de 6 mètres de nautada entà esvitar qu'es pilòtes acaben en arriu Garona.

Pendent era execucion dera òbra se realizarà ua melhora deth terren, a on i a un ample airau de zòna verda, mès damb eth menor impacte ambientau possible. Aguest projècte compdarà damb ua inversion finau de 108.871,73€.

“Aguesta pista poliesportiua exteriora ei un projècte que preten qu'es nòsti/es joeni/es agen un espaci a on poder practicar espòrt ar aire liure pendent es mesi de bona climatologia, sustot en ostiu”, comente eth dusau tinent d'alcalde e còsso d'espòrts de Vielha e Mijaran, Alberto López. E ahig que “damb aguesta intervencion dam compliment a ua des promeses electoraus, en tot seguir damb era linha der equip de govèrn de fomentar er espòrt e es abituds saludables”.