Diuèrsi equipaments patrimoniaus e glèises d'Aran daurissen tàs hèstes de Nadau
A fin d’ampliar era aufèrta culturau pendent aguestes hèstes de Nadau
Vielha e MijaranDes deth 26 de deseme de 2020 enquiath 9 de gèr deth 2021 demoraràn dubèrti diuèrsi equipaments patrimoniaus e glèises, abituaument barradi pendent aguestes dates. Aguesta iniciatiua ei un esfòrç conjunt des airaus deth Conselh Generau d’Aran de Torisme Val d’Aran e Musèus dera Val d’Aran, tamb era collaboracion deth Bisbat d’Urgelh, a fin d’ampliar era aufèrta culturau pendent aguestes hèstes de Nadau. Er aforament de toti es equipament e gléises demorarà limitat e se seguiràn totes es mesures sanitàries implementades peth Covid.
Es equipaments dubèrti segontes es oraris deth pannèu son tamb entrada liura e sense visita guidada, e son: glèisa de Santa Maria d’Arties, glèisa de Santa Eulària d’Unha, glèisa de Sant Fèlix de Vilac, glèisa de Sant Estèue de Betren, fabrica dera Lan de Vielha e Mòla de Salardú.
A mès d’aguesti equipaments, tanben son dubèrti ath public eth Musèu dera Val d’Aran, en Vielha, er Ecomusèu Çò de Joanchiquet de Vilamòs, e eth Musèu dera Nhèu d’Unha. Ath delà, son tanben dubèrtes e visitables es glèises dera Mair de Diu dera Purificacion de Bossòst, Sant Miquèu de Vielha, Santa Maria d’Arties (maitin) e Sant Andrèu de Salardú, excepte pendent es celebracions religioses.
