Er Ajuntament de Naut Aran crearà un Skate Park de mès de 500 m2
En totau, se destinaràn 165.000 èuros ath bastiment d'aguest espaci
ArtiesDempús de diuèrsi mesi d’amassades entre er Ajuntament de Naut Aran, era comunitat skate deth territòri e especialistes en sector, eth consistòri a aprobat era creacion d'un complèxe de 506m2 fòrça complèt e adaptat entà toti es nivèus en Arties. Se tracte deth prumèr Skate Park de granes caracteristiques qu'aurà era Val d'Aran pr’amor que, actuauments, sonque i a ua petita rampa ena poblacion de Vielha. En totau, se destinaràn 165.000 èuros ath bastiment d'aguest espaci que serà fin finau de hormigon.
Era idèa iniciau der Ajuntament de Naut Aran ère creà'c damb ua basa de gondron, mès des deth collectiu skate dera Val d'Aran s'avertic que siguesse damb un materiau coma er hormigon pr'amor que serie mens abrasiu as queigudes e derrapades. En aguest sens, laguens des 506 m2 ei contemplada era installacion d'un ‘bowl’, comunament nomentada piscina, e d'auti elements coma un ‘croissant’, ‘quarter slappy’, ‘wobblecano’, ‘europad’, entre d’auti.
Eth baile de Naut Aran, Cesar Ruiz-Canela afirme que “aguest projècte ei frut dera participacion ciutadana. Siguec ua idèa que se mos promoiguec a trauès des hilats sociaus e tot a anat rodat a compdar d’aqueth moment damb era sua collaboracion. Credem qu'eth nau Skate Park serà un gran atractiu esportiu que mos place en un lòc preferent ena practica d'espòrts alternatius”. Es òbres deth futur Skate Park començaràn en uns mesi, en tot coïncidir damb eth bastiment deth Pump Track que tanben se plaçarà en Arties. En aguest sens, Ruiz-Canela destaque que “auem dauant de nosati dus projèctes fòrça importanti entà potenciar er espòrt de montanha en nòste municipi. Era nòsta apòsta entà desestacionalizar eth territòri ei fòrça clara e demoram arténher ua grana responsa ad aguestes accions”. Er Ajuntament de Naut Aran considère que damb era zòna poliesportiva d'Arties amassa damb eth Pump Track e er Skate Park e era zòna de biciclèta de montanha d'Enduromies, se crearà un espaci ludic-esportiu en qué se promoiràn es abituds saludables entre es joeni.
