Comencen es òbres de melhora der enlumenat deth Palai d'Espòrts de Vielha
Se balharà compliment as normatives que fixe eth Consejo Superior de Deportes as installacions qu'acuelhen tanben competicions esportiues
Vielha e MijaranPendent aguesta setmana s'an iniciat es òbres de reforma der enlumenat deth Palai d'Espòrts de Vielha. Ua intervencion que permeterà, a trauès dera installacion d'un sistèma de lums LED, ua melhora dera qualitat der enlumenat d'aguest equipament esportiu municipau, atau coma amendrir eth consum energetic pendent eth sòn emplec.
Er enlumenat que i auie enquiara, compdaue damb un totau de 32 campanes industriaus, des quaus un totau de 7 unitats auien es ampoles honudes. Damb aguesta actuacion se substituïssen aguestes campanes en tot installar-ne ues LED dessenhades especiaument entà airaus industriaus, damb proteccion dera lent de policarbonat, de melhor rendiment e menor consum. Era poténcia unitària enquiara ère de 400w, e passarà a èster de 200w.
Un viatge realizadi toti aguesti cambis, se garantirà qu'er equipament complisque damb es normatives vigentes en çò que tanh ar enlumenat d'installacions esportiues (UNE-EN) e NIDE (Consejo Superior de Deporte). En aguest cas, coma installacion de tipe 2 (competicions de nivèu miei, partits de competicion regionaus e locaus).
“Aguesta actuacion ère fòrça de besonh, pr'amor qu'eth sistèma d'enlumenat actuau dera installacion ère ja obsolet e s'auie de renauir. Damb eth sistèma de lums LED generaram un important estauvi energetic, en tot implementar un estrument mès de qualitat e modernitat as installacions esportiues municipaus”, comente eth dusau tinent d'alcalde e còsso d'espòrts de Vielha e Mijaran, Alberto López.
