Convèni de collaboracion entà restaurar eth campanau dera glèisa de Bossòst
Eth Conselh Generau, er Ajuntament, era Diputacion e era Generalitat invertiràn 150.000 euròs
BossòstEth Conselh Generau d'Aran e er Ajuntament de Bossòst collaboraràn ena restauracion deth campanau dera glèisa de Bossòst. Eth sindic d’Aran,Francés Boya, e er alcalde de Bossòst, Amador Masrqués, signèren diuendres un convèni entath finançament deth projècte d’assolidament deth campanau dera glèisa dera Mair de Diu dera Purificacion.
“Era conservacion e proteccion deth nòste auviatge ei primordiau entath govèrn deth Conselh Generau d’Aran”, afirmaue eth sindic d’Aran, Francés Boya, en tot híger que: “era glèisa dera Mair de Diu dera Purificacion, que siguec declarada Ben Culturau d’Interès Nacionau en 2015, constituís un des melhors exemples dera arquitectura romanica aranesa deth sègle XII e supause entà Aran un gran tresaur culturau qu’ei de besonh suenhar”.
“En trabalh de restauracion que s’amiarà a tèrme ena glèisa, s’actuarà sus es henerècles que presente era estructura deth campanar mès tanben sus era estructura de husta que date deth sègle XVIII e qu’ei fòrça deteriorada”, explicaue er alcalde de Bossòst, Amador Marqués.
Des lèu 150.000 euròs que s’invertiràn en aguestes actuacions d’assolidament deth campanau, eth Conselh Generau d’Aran, laguens deth sòn convèni marc damb era Deputacion de Lleida, n’aportarà 94.000, era Ajuntament de Bossòst aportarà 18.000 euròs e eth Departament de Cultura dera Generalitat 35.000.
