Inici dera tempsada de pesca 2021 ena Val d’Aran

Vielha e MijaranEth Conselh Generau d’Aran a publicat dejà er edicte que darà per dubèrta era tempsada de pesca 2021 ena Val d’Aran a compdar de deman, 19 de març, enes aigües de saumònids (trueita comuna) de baisha montanha. En nauta montanha començarà a compdar deth 1 de mai e enes lacs a compdar der 1 de junh.

Sonque se poirà realizar era activitat dera pesca enes trams abilitats a tal efècte e publicats enes mapes editats peth Conselh Generau d’Aran, era rèsta de trams son consideradi vedats de pesca. Eth nombre maxim de captures autorizades per pescaire e dia ei proporcionau ara densitat de trueita actuau respècte ara densitat istorica, e ei de 6 captures en arriu Garona, 8 captures ena Bassa d’Aiguamòg e d’auti arrius e 12 captures en lacs e arrius entre lacs.

Enguan, coma nauetat, s’an ampliat eth numerò de km de pesca sense mòrt. Tanben cau rebrembar qu’er usatge deth plom e sòles de feutre ena pesca ei proïbit e qu’ei obligatòri portar pescadèra. En airau de Miei Ambient dera plana web deth Conselh Generau d’Aran se poiràn expedir es licéncies de pesca valides entara Val d’Aran e era rèsta de Catalunya, e tanben es permisi diaris especifics tà cada zòna de pesca controlada.